_ తెలంగాణ విప్లవ పతాక... దొరల గుండెల్లో సింహస్వప్నం చాకలి ఐలమ్మ
_ (నేడు సాయుధ పోరాట వీరవనిత చాకలి ఐలమ్మ 131వ జయంతి సందర్భంగా ప్రత్యేక వ్యాసం)
అభయం తాండూరు: నా ఇంట్లో ఆడు బిడ్డలున్నారు.. నా పొలంలో పంట ఉంది.. నా చేతిలో కర్ర ఉంది.. ఎట్ల వస్తావో రారా దొరా! అని నిజాం నవాబుల, భూస్వాముల గుండెల్లో సింహస్వప్నమై గర్జించిన పోరాట రూపం చాకలి ఐలమ్మ. తెలంగాణ నేల అందించిన అరుదైన విప్లవ రత్నం, దొరల అన్యాయాలపై తిరగబడ్డ తొలి విప్లవ జ్వాల చిట్యాల (చాకలి) ఐలమ్మ. నేడు ఆమె 131వ జయంతి సందర్భం.
సంకెళ్లను తెంచుకున్న చైతన్యం:
వరంగల్ జిల్లా రాయపర్తి మండలం క్రిష్ణాపురం గ్రామంలో 1895 సెప్టెంబర్ 26న జన్మించిన ఐలమ్మ, పాలకుర్తికి చెందిన చిట్యాల నర్సయ్యతో వివాహం తర్వాత పాలకుర్తిలోనే నివసించారు. అప్పటికే తెలంగాణ గ్రామాల్లో విసునూరు దేశ్‌ముఖ్ రాపాక రామచంద్రారెడ్డి, అతని అనుచరుల భూస్వామ్య దోపిడీ, వెట్టిచాకిరీ, అణచివేత పరాకాష్టకు చేరాయి. ఆ బానిసత్వ సంకెళ్లను తెంచుకోవడానికి ఆంధ్ర మహాసభ పిలుపుతో ఐలమ్మ పోరాట బాట పట్టారు.
భూమి కోసం.. భుక్తి కోసం.. తొలి సమరం:
ఐలమ్మ కుటుంబం కౌలుకు తీసుకున్న నాలుగు ఎకరాల భూమిలో పండిన పంటను అక్రమంగా దౌర్జన్యంతో గుంజుకోవడానికి విసునూరు దొర యత్నించాడు. గుండాలు, పటేల్ పట్వారీలు ఎందరో వచ్చి బెదిరించినా, ఐలమ్మ అంగుళం కూడా వెనక్కి తగ్గలేదు. నా చెమట చిందించి పండించిన పంటను తీసుకెళ్లడానికి మీరెవరు? అని ఎదిరించి నిలిచారు. పాలకుర్తి వేదికగా సాగిన ఈ భూమి పోరాటమే తెలంగాణ సాయుధ పోరాటానికి పునాది రాయిగా మారింది.
పోరాటాల ఊపిరి - సర్వస్వం త్యాగం:
ఐలమ్మను లొంగదీసుకోవడానికి దొరలు చేయని కుట్ర లేదు. భర్తను, కొడుకులను జైలుకు పంపారు, ఇంటిని తగలబెట్టారు, ఆస్తినంతా కొల్లగొట్టారు. అయినా సరే, ఆ వీరవనిత గుండె నిబ్బరం కోల్పోలేదు. సంఘం నాయకుల అండతో, ప్రజా బలంతో ధైర్యంగా పోరాడి తన పంటను, తన హక్కును కాపాడుకున్నారు. బానిసత్వంలో నలిగిపోతున్న వేలాది మంది పేదలకు ఐలమ్మ పోరాటం గొప్ప ఊపిరినిచ్చింది.
చరిత్రలో చెరగని ముద్ర:
మహిళలకు ఆత్మగౌరవ ప్రతీకగా, హక్కుల పోరాటంలో అగ్రగామిగా నిలిచిన ఐలమ్మ 1985 సెప్టెంబర్ 10న కన్నుమూశారు. విప్లవ పోరాటాల్లో మహిళల పాత్ర ఎంత కీలకమో ప్రపంచానికి చాటిచెప్పిన ఐలమ్మ ఆశయాలు నేటికీ ఆదర్శనీయం. సమాజంలో అసమానతలు, అణచివేతలు ఉన్నంత కాలం చాకలి ఐలమ్మ పోరాట స్ఫూర్తి తెలంగాణ గుండెల్లో చిరస్థాయిగా వెలుగుతూనే ఉంటుంది.
